千頌C：Elon Musk狂笑美軍F-35戰鬥機「shit design」，無人機與零件製造商Unusual Machines同日爆升34％
1：Elon Musk星期日喺自己地盤X出post，狂笑美軍F-35戰鬥機，話「呢個年代，仲有白癡（idiots）去製造載人戰機，就好似F-35咁」，隔離仲放咗個垃圾桶
emoji；之後又話F-35係「shit design」，係「歷史上性價比最差的軍事裝備」，同時力sell無人戰機先係空戰嘅未來。2：呢三兩個post，佢可能只係用左十幾秒去寫，但以佢今時今日地位，足以令相關公司股價一係炒到癲，一係跌到癲。佢所指嘅idiots，其實只有一間公司，就係F-35製造商Lockheed Martin，俾佢寸一寸，股價周一就被佢擊落4%。同一時間，無人機與零件製造商Unusual Machines，由於佢同時都有製造軍用無人機，結果同日爆升34％。
3：咁都未算最誇，更誇嘅係去到周三，Unusual Machines公佈，侵侵個仔會成為佢哋嘅顧問！喂！真係咁巧合咩？
4：其實Elon Musk唔係第一次寸F-35話佢廢，早幾年都已經講緊，但今時唔同往日呀。佢可以話係當今世界級風頭躉，唔單止坐擁一個social media，仲係全球首富，兼夾係侵侵下屆政府嘅一份子，有權、有錢、仲有say。
佢之後就會同美國企業家Vivek Ramaswamy，一齊做刀手，統領新部門「政府效率部」（Department of Government Efficiency, a.k.a DOGE），目標就係削政府開支2萬億美金。至於F-35戰機呢個project，係五角大樓史上使最多錢嘅戰鬥機項目，至2088年預計要使2萬億美金。
5：佢會唔會搞國防開支就未知住，但佢同Vivek Ramaswamy喺《華爾街日報》專欄就點名「五角大樓」，話佢連續7年過唔到audit，「證明班友根本唔知8000億美金budget係點使。」
6：睇返往績，Elon Musk喺X度出嘅post，影響資本市場事件，甚至發佈股價敏感消息，隔一排就出現。一宣佈佢做DOGE部長，佢就即刻用AI整個DOGE department logo。Logo就緊係放埋同名嘅狗狗幣doge coin標誌柴犬，結果呢隻幣就大升。
7：2021年，佢只係出咗個post講「I kinda love Etsy」，當日呢間電商就升咗8%。
最癲一次係，2018年8月頭佢出post講，「考慮將Tesla 每股420美金私有化，資金已secured！」消息一出股價漲11%，玩幾日後股價就跌返轉頭。到8月底佢就話都係唔私有化啦。之後佢俾美證監周，話佢根本冇確認資金來源，最後要罰款2000萬美金，辭去主去席一職，仲應承每次出post講Tesla都會問律師先。
不過，佢應該冇理到，去到2020年，佢無啦啦講「Tesla股價太貴啦！」當日Tesla就跌咗一成。
8：Elon Musk嘅影響力越來越大，由科技企業，再到資本市場，甚至國防都關佢事，佢可以話係無處不在。無論點都好，市場未來只會更加mon住Elon Musk任何言論。
不過呢個人，同侵一樣都係估佢唔到，如果佢下一次講，其實「F-35結合Tesla嘅software就完美啦」，之後係咪又炒返轉頭？將佢即興發言當「市場風向標」，即炒即食無問題，但記住，轉身一定要夠快。所以，特別係炒meme股，一定要跟貼 Elon Musk 出 post 嘅速度。
9：最近做咗Spotify Advertising HK旗下SpotiTalk官方合作partner，所以開咗podcast，岩岩一集就係講Elon Musk其他嘢。可以去Spotify search 我個名就揾到，免費用戶都聽得到，睇得到！多謝各位支持唷！
留言
發佈留言